مها الفرات
نائبة رنا العزاوي
عدد المساهمات : 870
تاريخ التسجيل : 24/12/2009
العمر : 31
الموقع : United State
 |  موضوع: أبوذيااااااااااااات................... الأحد يناير 17, 2010 12:53 am | |
| بعد ما اذكرج بحالي و اشعرج
انا بنثرج جنت نغمة و شعرج
تلاكن حظي و عيونج و شعرج
سواد و صار يومي اظلم علية
أصد وازعل وادير العين طبعان
لجن لجمات إلك بالقلــب طبعان
حلو بكلشي لكن بيــــــك طبعان
تـشــــك وتــغار بيــــــــها عليه
على ضيم الهوى ياروحي علمي
بيهة ارفعت من هاليوم علمـــــي
سألتها المستوى كالتلي علمــــي
سادس ومنو الينشد عليـــــــــــة
حلو يلشعرچ مفلفل فلافل
وحك عيناج عن حبچ فلافل
ولو العشرةوياج صمون وفلافل
دجاج تصير ومطبك سويه
يباري المرض هد حيلي وهدني
ولامرة ابتعد عني وهدني
ارشدني لرحمتك يارب وهدني
طريح فراش والونه خفيه
اعلن يا گلب حبك وشيعة
واتبع راي كل مخلص وشيعة
عيب حچاية السنة والشيعة
الوطن لاهل الوطن كلهم سوية
يردلهه شعر خرافي من صدك هذا
انا الشيعي الحزين ابزغر سنـــــــي
اعض ايدي ابندم ونكسر سنــــــــــي
من صار الجتل شيعي اعله سنــــــــي
ولمحتل أمنيته اصبحت هـــــيه
يا امريكا المخطط ضاع وتشتت
ويا بوش النذل همك التفريق وتشتت
ترة الشيعي سني بعدة ما تشتت
عراقيين مو بس بالهوية
ارد اجرحن ايدي والرجل والهام
واقرة قصايد عالشگَة والهم
واغني لكاظم وحاتم والهام
كلش صعب يا عين فراگَچ علية
مرة مرة
البخت وياي مايوم عدل مرة
ودنياي صارت مو حلوة مرة
مثل مريض بسل محد يمرة
ولحد ينشد عن حالتة الردية
هلا بريم الحمادة اللي لفاني
عليل بحبه كَلبي ولفي اني
لوانّه بالهباري لفني آني
يشافيني ولا يظل باس بيّه
2-
وحكَ اللي خلكَ نفس من ابيها
اظل للموت عشرتكم أبيها
أبالك علاسرار تبوح بيها
لغير اهل الاسرار اتظل خفيّه
3-
زماني اسكَاني من لوعات سم لاي
انحلت ماكدر اشيل براحه سملاي
أظن انسى الحروف وأنسى اسم لاي
ولا أنسى حبيب يعز عليه
يلي طعم شفاك أحلى من السكر
وكلبي من محبتك ذاب وسكر
وعقلي ظل بس ألك ولغيرك سكر
مجنون وبشوفتك يرد عقلي أليه ..... وسفه الدهر شتتكم وطركم
حسافه ماكضه منهم وطركم
بذجركم هذا انه اهذي وكركم
يعيد الله شتتكم جمع ليه
زماني جرد اسيوفه وسنهه
عليه اوحرمت عيني وسنهه
وحق اللي فرض خمسه وسنهه
بعد هيهات عيش ايصير اليه
حبيبي دك بذرعانه ولجتاف
بضلعي جاسي اللبي ولجتاف
رضينه بحبس دندوشه ولجتاف
وهي سجاني وتفتر عليه
مر ولفي ايهبتني ومره هبته
ومره اوصلت يمه مره هبته
طحت مقدر يصاحب مره هبته
اسد يخسه الاسد ملقاه اليه
ابنار الهجر يامهجه دموعاي
على مصابي السمه يمطر دموعاي
اشما هلن يدندوشه دموعاي
حسناتج تبدل بالف سيه
سريتوا بالضعن ياترف هاوين
جفيتوني ولعند الغير هاوين
هاميت يحلو الطول هاوين
حياتي والنظر اقبالك عليه
وحم الالف واللامين والها
روحي بهوى ساهي العين ولها
لها ثغر وجبين وعين والها
خذ شبه البدر لو سطع ضيه
من مثلي دمع عيني يهلهه
سبب غالب على روحي يهلهه
وعلي تحيولكم ميت يهلهه
من تبدي ترد الروح اليه
حزني عليك مايبطل وناحي
اسب اللامني بودك ونا حاي
تبات الناس مستوره ونا حاي
ليلي والنجم يشهد عليه
وحك آية عصا موسى وسينا
الك حثت رجايبنه وسينا
الك حسن النبي يوسف وسينا
الي والنور الك والنار اليه
يحادي روعت قلبي بلحداي
يخايب لفني وياهم بلحداي
اون طول الدهر حتى بلحدي
على الساروا وخلوني شجيه
كل مغرم برت علته وناله
سعيد اللي حضه بشخصك وناله
الطارش من سمع نوحي وناله
ترك شغله وبجه رحمه عليه
حبيبي جفاك المعبودج صبراي
حبيبي كمت اكل للروح صبراي
حبيبي من ذكرتك نفذ صبراي
حبيبي يصب فراقك عليه
الدمع نهران بخدودي كراهه
حبيبي سلب من عيني كراهه
ليش امحبتك صارت كراهه
اشبده مني وتشمت اعداي بيه
روحي والهوى ودنياي وعداي
علي وشلون اشيل الجدم وعداي
صابر وانتظر واشوف وعداي
ابفرح لو دوم وكتي محيط بيه
ابكثر مانوح ملوني يراني
طحت والشامت ابعينه يراني
يخوتي السبع من جسمي يراني
اكبال اهلي وعمامي اتشوف هيه
اف من زماني اه منه
على اللي عشرتي وياه منه
اكله الدرب هذا يكول منه
اكله فوت بيه يرد عليه
دمه دمع البيابي سال وانهات
عليك اكضي العمر حسرات وانهات
بهواك انه اعذلتني الناس وانهات
ما خذني الهوه غصبن عليه
المصايب بس على روحي تلافت
يقلبي اعله النكر طيبك تلافت
اون وعطامي بهجرك تلافت
طريح وساد دوب النفس بيه
عفاني جيف الى مهجه ولي روح
اداري بالعلل كلها ولي روح
ماني بحال من يبكه ولي روح
ابحالك يالقطعت الوصل بيه
روحي مشت وياهم وهامت
على الما بينت منهم وهامت
اجفوف اعليك اطيرها وهامت
واخلي ادموم تجري اعلى الوطيه
تهت محد من احباب علي شار
ينجيني الذي شمسه علي شار
حجيت المصلحه طلعت على شار
رجيت الغانمه صارت رديه
هذا اللي لعند اعضاي هد هد
ملهي وابد ماينصاد هد هد
اكله اقرب يقلي ليك هد هد
ارفع مشتهاك اشتظن بيه
ناحل وامشي امكابر تراني
اجلد خاف عدواني تراني
تاره الموت يدهاني تراني
اصحه من يمر شامت عليه
قوم انصب يصاحب ماتم النه
على الوياه ليله ماتم إلنه
لون الرجل يملك ماتمنه
مهو بالهون فركاهم عليه
يصاحب لو تشوف اشلون كتماي
على عيوني ويسح الدمع كتماي
اشما اقل للروح سر الهوه كتماي
تحن وتهيج الساكن عليه
تظن انساك وانته الروح واسلاك
سبب مايوم مني انقطع وسلاك
أعيش آنه عقب فرقاك وسلاك
معافي والوشاة أعملوا بيه
هذا البيه كنتم لايميني
وعذر مافاد بيكم لايميني
لو تكتف يساري وي يميني
هذاك انه الهوى غالب عليه
اشمالك يازماني علي صليت
ابنار وحمسيت اجلاي صليت
مثل ماصلت ام عمران صليت
فنكحني الهوه وذبني بنويه
مدري لاتناشدني على احشاي
بجيت وصب دمع عيني على حشاي
تبعت الضعن وكفوفي على حشاي
إشما مال الضعن روحي إتميل بيه
أنام وشوك محبوبي يعاني
افز مرعوب واتخيل يعاني
هلي الدمع مرخوصه يعاني
على اللي بالوصل شحوا عليه
نصحته اولا نفع وياه نصحاي
سكاره احنه بهواه مابعد نصحاي
جفاني وصرت نصي ميت نصحاي
نحيل ولا اثر نكاد بيه
وحق التعبده شيعه وسنه
ذوله الحرموا نومي وسنه
عليك اسيوف جردنه وسنه
علمك يلعبدت اشميت هيه
اعذرني والوكت عنك لهاني
بعزاك الزاد الي ابدا لهاني
تفر من البدن روحي لهاني
بسبب ماشالت التابوت هيه
انشاء الله تعجبكم تحياتي مها الفرات  | |
|
رنا العزاوي
مديرة منتدى رنا العزاوي
عدد المساهمات : 677
تاريخ التسجيل : 01/07/2009
العمر : 35
الموقع : .....
| | موضوع: رد: أبوذيااااااااااااات................... الأحد يناير 24, 2010 12:10 am | |
| حلو يلشعرچ مفلفل فلافل
وحك عيناج عن حبچ فلافل
ولو العشرةوياج صمون وفلافل
دجاج تصير ومطبك سويه | |
|
مها الفرات
نائبة رنا العزاوي
عدد المساهمات : 870
تاريخ التسجيل : 24/12/2009
العمر : 31
الموقع : United State
| |
