يا حلوه وجميله بدون أستثناء
شلون بدون رخصه الكَلبي أدخلتي
ويا تاج الجمال شلون هيج ايصير
ابشورج وعلى كيفج حالي غيرتي
تبخر شاطي صبري والامل معدوم
واستنى المطر والغيمه ما جتي
ما احمل بعد وانا ضعيف ابهاي
واخجل ما أكَول الرايداها انتي
اصطك من اشوفج ما اجمع احروف
ويتلعثم لساني اكَبالي لو صرتي
لأن نظراتج ابوسط الكَلب نبضات
والف هنيالج على عيون حورية
ربج عالرجال اموزع النسوان
وانا اشكر الرب لن صنفج ليه
انتي الروح انتي الذي بين احشاي
وانتي اعذب هواء اشتمه يوميه
انا كلي ثقه اتحبيني انتي اهواي
لجن طبعج خجل ما يحجي حبيه
بس انه ابد ما اعرف استسلام
واظل اجهر ابحبج عالفضائيه
اظل اجهر ابحبج حتى اسمع الناس
واللايم بعد ما يعتب اعليه
عجب هاكَد احبج وانه الج اشتاكَ
وابد مو حاسه وطكَ العشكَ ميه
كَلبي اهواي بيج اتعلق ومفتون
دكَليلي ابطريقه اتحسسج بيه
دكَليلي دفهميني دحاجيني
ومثل حبي الج يا وردة حبيني
احبج ثم احبج ثم احبج حيل
وما ابطل احبج وانتي تدريني
كل ليله ادكَ باب المحبه اعليج
اريد الكَاج وتغيبين عن عيني
وصفن عالنجوم انشدهن انه عليج
او ولا واحد يجاوبني ويدليني
نظراتج سحر دوختني ونجنيت
ومثل اسهام بالدلال ترميني
اشكَد يحمل قساوه كَلبج الولهان
تشوفيني احبج ونتي تجفيني
اذا هايه قسمتي انه راضي ابهاي
وراضي ابهوى حبج موتي يلفيني
وعلى كَبري اوصي اسمي لا ايكتبون
خيكتبون اسمج لن يسليني
وبطن الجفن صورة الج وياي
من احساب منكر هي تحميني .
كاتب هذه الابيات بتاريخ اسامه الحزين بتاريخ 12/1/2010 منذ اول لحظه رايتها
الى فتاة في الكليه احبها من كل قلبي ولا اعرف بأي طريقه اكلمها بالموضوع فهل هناك من يرأف بهذا
الشاب المولع والهائم بتلك الفتاة من اعماق قلبه ويريد معها المستقبل الواعد المبني على اساس الحب والوفاء .
ارجوا ان لا احد يسيء فهمي في هذا المنتدى كافة .
زميلكم اسامه الحزين الغامض المتفائل المحبوب