مستحيل .. ما حب شوفة وجههم .. ما أريد أسمع عـتـبـهـم
و الدليل .. صارت دموعي عزيزة .. و خطوتي ملت دربهم
لا يـگـلـبـي .. وشل حبي
تدري متخاصم وياهم
ليش تـتألـم وراهم
حـيـرتـنـي الخاطر الله .. إنت گـلـبـي لوگـلـبـهـم
*****
هاك شوف .. چـم جرح بحشاي تركوا چـم سهم .. جم عله بيه
بالألوف .. ليش تساهل اوياهم .. مو تعذبنه ســويـه
ولك عوف .. خلصت ثبوتك يـگلبي .. بعد مالك قابليه
عين روحك .. على جروحك
ودع العشره و غضبها
واترك السله و عنبها
واللي ينشد عن سببها
گـول سلتهم ملکهم .. و العنب كله عنبهم
ليش متلهف عليهم .. إنت گـلـبـي لوگـلـبـهـم
*****
إبقى عندي يا گلب آنه الأحبك .. آنه اليقدر شعورك .. شفت ودي
طعت من أجلك هواهم .. غايتي أضمن سرورك
صرت ضدي .. لو عفتني و طاوعتهم
الله ليسهل أمورك
وبظلمهم .. أيدتهم
تتبع الحللوا چتلك
واللي ما يردون وصلك
يا گلب سواها گلبك
ليش تتردد عليه .. قصدك اتزيد غضبهم
أرد أنشدك وين مكرك .. إنت گـلـبـي لوگـلـبـهـم
*****
شمتهم .. والله لو عندك إراده
چـان کل حبك عصرته .. جان عفتهم
چان معبد ذكرياتك .. فوگ حيّك هدمته
طعمتهم .. علمتهم عالأذيه
وگلب کل عاشگ خذلته
خبطتني
چاللي ينشد شـگله
لو لمسح دمعي الأهله
گالوا .. الحب مو مذله
أسمى من حب المدامع .. واغنى من منجم ذهبهم
ليش مشدوه ابجفاهم .. إنت گـلـبـي لوگـلـبـهـم
*****
أرد أذكرك .. إنت گلبي من الطفوله .. ولو مدة الهم هديتك
ما أغدرك .. كون ما ترضى بأذيتي .. ولا أنا أرضى ابأذيتك
طال هجرك .. أربع سنين اتركتنه .. واحمد الباري لگيتك
صفي بالك .. على حالك
آنه مخلص مو خصيمك
وانت گلبي و غيمي غيمك
وعندي نيشان ابصميمك
جرح من فقد الأمومه .. وجرح آخر من سببهم
اتفكر .. إتعاند.. إتراوغ .. إنت گـلـبـي لوگـلـبـهـم